Isa ka trahedya ang nagluntad sa Lapu Lapu Day Filipino heritage festival sa Vancouver, British Columbia, sang Sabado sang gab-i, Abril 26, 2025 kunsa diin Isa ka itom nga Audi SUV ang nag araro sa mga tawo nga nagatipon sa festival, nga nagresulta sa kamatayon sang 11 ka tawo kag madamo pa nga pilason.
Ginkilala ang suspek nga si Kai-Ji Adam Lo, 30 anyos, residente sang Vancouver, nga may kasaysayan sang mental health issues. Ginkumpirma sang mga otoridad nga wala sang koneksyon sa terorismo ang insidente. Si Lo gin-aresto sa lugar mismo sang insidente kag ginpasakaan sang walo ka kaso sang second-degree murder, kag posible pa nga magdugang ang mga kaso.
Ang Lapu Lapu Day festival isa ka selebrasyon sang kultura kag kasaysayan sang mga Pilipino sa Vancouver, nga ginahiwat kada tuig agud dumdumon si Datu Lapu-Lapu, ang lider nga nagbato sa kolonisasyon sang mga Kastila. Ang festival ginahiwat sa Sunset on Fraser neighborhood, diin nagatipon ang komunidad sang mga Pilipino kag ila mga kaiping nga lugar.
Nagpahayag sang kasubo si Prime Minister Mark Carney kag gin kanselar ang iya mga campaign events bilang pagpasidungog sa mga biktima. Nagpahayag man sang suporta ang mga lider sang British Columbia kag syudad sang Vancouver sa komunidad sang mga Pilipino.
Padayon ang imbestigasyon sang mga otoridad sa insidente, samtang ginahatagan sang suporta ang mga biktima kag ila pamilya.
Ang komunidad sang mga Pilipino sa Vancouver nagahiwat sang mga vigil kag panimbahon bilang pagdumdom sa mga napatay kag pagpakita sang pagkahiusa sa tunga sang trahedya.
