Magalab-ot sa 130 ka mga foreign delegations upod ang 50 ka mga heads of state kag 10 ka mga kasamtangan nga monarchs ang magatambong sa lubong ni Pope Francis.
Sunó sa Vatican, posible pa nga madugangan ang nasambit nga listahan tubtob sa adlaw sang Sabado.
Ginpahibalo man sang Vatican nga ila ginpalawig ang oras sang public viewing sa bangkay sang napatay nga Santo Papa.
Matapos na kuntani subong nga gab-i sang Biernes ang pagpila, apang tungod sa kadamo sang luyag makakita sa Santo Papa sa iya katapusan nga higayon, ila ini ginpadugay pa.
Nadumduman nga naglab-ot sang malaba nga pila ang mga tawo halin pa sa iban nga pungsod agud lang masilayan ang Santo Papa.
Sa sulod pa lang sang halos isa ka semana, nagtala na ang Rome sang mataas nga numero sang mga dayuhan kag turista nga nagabisita para makakita sa bangkay sang Santo Papa.
Sunó sa mga opisyal sang Rome, posible nga malabwan pa sini ang kadamuon sang mga nagpakigbuylog sang napatay si Pope John Paul II sang tuig 2005.
