Nanindugan ang White House nga indi na magbag-o sang hunahuna ni US President Donald Trump sa ginpatuman nga reciprocal tariffs.
Bisan pa man nga ginakritiko ini sang madamo nga mga lider sang kalibutan kag ang pagnubo sang stock market sa US.
Suno kay Secretary of Commerce Howard Lutnick, nanindugan gid ang US President nga ang amo nga pagpataw sang mga taripa para man sa kaayuhan sang ekonomiya sang US.
Gina-usuisa naman sang iban nga pungsod kon ano ang ila mahimo agud mabalusan ang ginpatuman sang US nga mataas nga reciprocal tariff.
Ginpahayag ni Brazilian President Luiz Inacio Lula da Silva nga ila pagaprotektahan ang ila mga kompaniya kag mga trabahador.
Ikaduha ang Brazil sa pinakamadamo nga exporter sang baka sa US sunod sa Canada.
Ginpahayag man ni White House spokesperson Karoline Leavitt kon ngaa wala sa listahan ang Russia sa mga pungsod nga ginpatawan sang mataas nga reciprocal tariff.
Ginpahayag niya nga ang Russia amo ang pungsod nga may ginatubang nga madamo nga sanctions halin sa US.
Upod sang Russia sa sini amo ang Cuba, Belarus, kag North Korea.
