Ginkumpirmar sang World Health Organization (WHO) nga indi magnubo sa 28 ka mga health workers sa Lebanon ang napatay sa sulod lang sang isa ka adlaw.
Ini samtang nga nagapadyon ang dalagko nga pagpamomba sang Israel sa Lebanon sa diin 37 ka mga medical facilities sa southern Lebanon ang nagsirado kag tatlo ka mga ospital sa Beirut ang napwersa nga mag-evacuate sang ila nga mga pasyente kag staff.
Napatay man ang pila ka mga paramedics sa airstrikes samtang nga naga-rescue sila sa una nga mga biktima sang pag-atake.
Gintawag ni Lebanese health minister Firas Abiad, nga isa ka sahi sang ‘war crime’ ang pagpatay sang Israel sa mga paramedics.
Suno naman kay Lebanon Prime Minister Najib Mikati, ginabanta 1.2 million ka mga tawo ang na-displace sa ila nga pungsod.
Ginaakusaran sang Israel ang Hezbollah nga naglunsyar ini sang ginabanta 230 projectiles gikan sa Lebanon pakadto sa Israeli territory sang nagligad nga adlaw.
Apang ginpahayag naman sang Hezbollah nga naglunsyar lang sila sang 32 ka mga pag-atake. Suportado sang Iran ang nasambit nga grupo.
