Ginsiling ni Senador Ronald Dela Rosa nga kabahin sang “demolition job”ang testimoniya ni anay Iloilo City mayor Jed Mabilog sa Quad Committee sang House of Representatives.
Sa pag-tambong sini sa hearing, ginpahayag ni Mabilog nga nakabaton ini sang impormasyon nga mapilitan ini nga itudlo sanday anay Senators Franklin Drilon kag Mar Roxas bilang mga drug lords.
Gindugang pa ni Mabilog nga nakabaton ini sang pamahog sa iya nga kabuhi kag sang iya pamilya matapos nga gintawag ini ni anay President Rodrigo Duterte nga protektor sang narcotics trade apisar pa nga wala sang ebidensya.
Suno kay anay Philippine National Police (PNP) chief kag sa karon Senador Dela Rosa, ang imbestigasyon sang Kamara ang isa ka “fishing expedition.”
Gindugang pa sang senador nga wala sang impormasyon nga involved sa iligal nga droga sanday Drilon kag Roxas.
Gindugang pa sini nga wala ini ginmanduan ni Duterte nga ilakip sa listahan ang bisan sin-o man mangin ang iya mga kasumpong sa pulitika.
Nagpanawagan naman si Dela Rosa kay Mabilog nga hingadlan ang “general” nga nag-abiso sa iya tuhoy sa nasambit nga plano batok duha ka mga anay opisyal.
