Ginkakas sa serbisyo sang Taliban’s morality ministry ang 280 ka mga myembro sang security force bangud sa kapaslawan nga magpatubo sang bungot.
Ginpreso man sang ministry ang masobra 13,000 ka mga tawo bangud sa ila “immoral acts” sang nagligad nga tuig suno sa mga opisyales.
Gin-athag naman sang Ministry for the Prevention of Vice and Propagation of Virtue sa ila annual operations update nga halos katunga sang mga ginpreso ang ginhilway man matapos ang 24 oras.
Nahibaluan nga halin sang naangkon nila ang poder sang Agosto 2021, gin-require sang Taliban ang tanan nga government employees nga lalaki sa nasambit nga pungsod nga magpatubo sang bungot.
Samtang ang tanan nga mga babaye dapat nga magsuksok sang malagba nga mga bayo nga nagatabon sa halos bilog nila nga lawas bilang pagsunod sang laye sa Islam kag sang kustombre sang Afghan.
Madugay na nga ginapakamalaot sang human rights organizations kag sang United Nations ang morality ministry bangud sa pagdumili sa mga kababaihan sa ila lugar nga hilway nga magpahayag.
Ang natumod nga ministry ang nagbulos sa nabungkag nga women’s ministry premises sa Kabul matapos nga ginsakop ang mga ini sang Taliban sang 2021.
