Matapos boluntaryo magsungka sa talatapan sang Criminal Investigation and Detection Group (CIDG), nakapiyansa na kag temporaryo nga naka angkon sang kahilwayan si anay Negros Oriental Governor Pryde Henry Teves.
Nahibaluan nga boluntaryo nga nagpadulong sa talatapan sang CIDG sa Negros Oriental si Teves matapos nag-isyu ang korte sang warrant of arrest batuk sa iya sa kaso nga paglapas Terrorism Financing Prevention and Suppression Act of 2012.
Gin-isyu ang warrant of arrest sang Regional Trial Court, Seventh Judicial Region, Branch 74, Cebu City sang Mayo 13, 2024 kag gintalana ang P200,000 nga piyansa.
Matandaan nga sang Agosto, gintumod ang anay Gobernador kag ang utod sini nga si anay Congressman Arnulfo Teves kag 12 ka iban pa bilang mga terorista bangud sa kaangtanan sang mga ini sa pila ka kaso sang pagpatay kag harassment sa Negros Oriental sang nakaligad nga mga tuig.
Kalakip sa insidente nga gina angut sa mga ini ang pagpatay kay Negros Oriental Governor Roel Degamo sang Marso 2023 nga nagresulta man sa kamatayon sang pila pa ka sibilyan.
