KORONADAL CITY – Apektado subong ang 5 ka barangay sa banwa sang Sto.Niño, South Cotabato matapos nga gindalasa sang buhawi nga nagresulta sa pagkaguba sang pila ka mga puluy-an kag mga pananom sa nasambit nga banwa.
Ini ang ginkumpirmar ni Julius Ceasar Fale, MDRRMO-Sto.Niño sa ekslusibo nga interbyu sang Bombo Radyo Koronadal.
Suno kay Fale, ang mga barangay nga apektado ang ginalakipan sang mga barangay sang M.Roxas, San Vicente, Panay, Guinsang-an kag Katipunan.
Ginpahapa man sang paglaslas sang mabaskog nga hangin ang 3 ka mga puluy-an nga totally damaged bangud sa mga natumba nga mga dalagko nga puno sang kahoy kag pila ka ektarya man nga mga pananom nga halarbeson na kuntani ang naguba sang mabaskog nga hangin.
Nagpatukod na sang temporary shelter ang Municipal LGU sang nasambit nga banwa para sa mga apektado nga residente.
Sa subong nagapadayon pa ang clearing operation sang MDRRMO Sto-Niño sa mga sanga sang puno sang kahoy nga natumba bangud sa mabaskog nga hangin.
Nagapadayon naman ang damage assessment sa mga puluy-an kag agrikultura sang nasambit nga banwa.
