KORONADAL CITY – Ginpasangkad pa sang South Cotabato PNP ang alerto sa bug-os nga probinsya kasunod sang nagluntad nga operasyon sa Brgy. Lamsugod, Surallah nga ginkapatay sang leader sang ISIS-linked Dawlah Islamiyah terror group kag utod sini.
Suno kay South Cotabato Police Provincial Director Col. Jemuel Siason sa interbyu sang Bombo Radyo Koronadal, iya na nga ginbutang ang bug-os nga probinsya sa full alert status kag ginmandoan ang mga chiefs of police sa ila nga mga nasakupan nga mangin alerto batok sa anuman nga kalakasan ukon sa posible nga pagpanimalos sang nasambit nga grupo bangud sa pagkapatay sang ila leader nga si Geoffrey Nilong kag utod man sini nga si Al-Amen.
Dugang ni Siason, nagapadayon man ang ila hot pursuit operations batok sa duha pa ka mga kaupdanan sang mga suspek nga nagpalagyo makaligad ang nagluntad nga pagbaylohanay sang lupok.
Nagapanawagan naman ini sang kooperasyon halin sa mga pumuluyo agud masiguro ang kaluwasan kag seguridad sang mga ini batok sa anuman nga sahi sang terorismo.
Madumdoman nga ginlikawan sang mga ini ang checkpoint sa nasambit nga barangay rason nga nakaangkon sang lagsanay kag baylohanay sang lupok rason nga ginkapatay sang mga suspek.
Narekober sa mga ini ang mga bomb components kag motorsiklo nga gin-usar.
