KORONADAL CITY – Emosyonal nga ginpakigbahin sang isa ka OFW sa Saudi Arabia ang ila sitwasyon didto makaligad maapektohan ang ila palangabuhian bangud sa coronavirus pandemic.
Sa eksklusibo nga interbyu sang Bombo Radyo Koronadal kay Jhonie Villacanas Nacario, isa ka OFW sa nasambit nga pungsod kag tumandok sang Bo.5 Banga, South Cotabato, ginpahayag sini nga nagbudlayan kag nagakabalaka na sila sa ila kaugalingon bangud nawad-an ang mga ini sang obra kag na-expire man ang ila visa sa tunga sang pandemiya.
Ginpakigbahin man sini nga may mga tion nga nagapangayo na lamang ang ila grupo sang bilin nga mga utanon sa mga merkado sa nasambit nga pungsod agud lamang makakaon kada adlaw.
Dugang pa sini, ginpalab-ot na nila ang ila hibubun-ot sa ila nga ahensiya ang ila sitwasyon agud mabuligan apang tubtob sa subong wala pa sila sang may nabaton nga sabat.
Sa subong hangyo na lamang nila nga makapauli sa Pilipinas sa madali nga tion.
