KORONADAL CITY – Nagpaandam ang isa ka concerned citizen nga posible nga magatuhaw naman ang isa ka panibag-o nga investment scam nga magapangtunto naman sa publiko sa katungaan sang coronavirus pandemic.
Sa eksklusibo nga interbyu sang Bombo Radyo Koronadal kay alyas Ven, ginsaysay sini ang suno pa operasyon sang CROWD-1 Asia Pacific Inc. agud makapangrecruit sang mga miyembro nila.
Base sa requirement sang ginapatihan nga investment scam, kinahanglan lamang suno pa nga magregister sang P6,000 tubtob P240,000 kag mahimo nga maka-avail sang mga benepisyo.
Mahimo man suno pa nga makaganar sang kwarta pinaagi sa paghampang sang online games, apang ginpaathag sini nga indi pa available ang nasambit nga mga hinampang sa Pilipinas.
Ginbuyagyag man sini ang mga paagi sa pag-intra nga ginalakipan sang madason:
*streamline bonus ukon pagkaangkon sang bonus sa pag-intra lamang kag kun madamo ang mga miyembro mas dako ang mabaton;
*binary pairing ukon isa ka sahi sang pyramiding plan;
*fear of loss bonus kun sa diin may yara sang mabaton nga bonus kun may maghatag sang sponsor;
*gambling residual income nga makuha ang benepisyo halin sa online games kag pagsugal; kag
*matching bonus kun sa diin kun maka-recruit sang apat ka miyembro may yara suno pa sang 10% nga komisyon.
Apang nagakabalaka man si alyas Ven nga posible nga nagapamintaha ang nasambit nga grupo sa mga miyembro sa tion sang covid-19 kun sa diin posible nga gin-usar sang iban nga mga miyembro ang ila P5,000 nga benepisyo halin sa SAP sa pagparehistro sa baylo nga pambakal sa mga panginahanglanon sa balay.
Posible suno pa nga magapanumbalik ang isyu sang KAPA kag Alamco kun sa diin madamo ang natuntohan makaligad nag-invest apang wala nabalik ang ila mga kwarta tubtob sa subong.
Base sa advisory sang SEC, wala pa nakakuha sang secondary license halin sa ila talatapan ang Crowd-1 kag wala man ginabawi ang advisory nga ginpaguwa nila batok sa sini nga investment scheme sang nakaligad nga semana.
Bukas naman ang talatapan sang Bombo Radyo Koronadal para sa sin-oman nga representante sang Crowd-1 agud makapaathag kag madepensahan ang ila nga bahin.
