KORONADAL CITY – Nagresulta sa trahedya ang malipayon nga paglagaw sang isa ka pamilya sa Barangay Kablon, Tupi, South Cotabato sang nakaangkon sang diperensiya kag wala nag-kagat ang brake sang ginasakyan nila nga van kag nahulog sa 20 metros nga kadalumon sang pil-as.
Ginbawian sang kabuhi ang isa ka 5-anyos nga bata samtang nakaangkon naman sang bali, pilas kag bun-og ang walo ka iban pa.
Ini ang ginkumpirmar ni Municipal Disaster Risk Reduction and Management Officer (MDRRMO) Emil Sumagaysay sa eksklusibo nga interbyu sang Bombo Radyo koronadal.
Suno kay Sumagaysay, papuli na kuntani ang mga biktima sa siyudad sang Heneral Santos gikan sa isa ka tourist destination sa banwa sang Tupi, South Cotabato ag pag-abot sa nasambit nga lugar, nagpalya ang brake sang van nga gintunaan sang pagkahulog kag pagbaliskad sang salakyan sa madalom nga pil-as.
Gilayon naman nga gindala sa pinakamalapit nga hospital ang 6 ka iban pa samtang ang 2 ang nakaguwa na bangud sa minor injuries lamang nga naangkon sang mga ini.
Dugang pa sang opisyal, accident prone area ang lugar kag nagakadapat lamang nga mabutangan sang road signages kag steel fences labi pa nga blind curve ang nasambit nga dalana.
Madumduman nga indi ini ang una nga vehicular accident nga nagluntad sa nasambit nga lugar.
