KORONADAL CITY – Nagalab-ot sa P630,000 nga kantidad sang mga illegal nga sigarilyo ang nakumpiska sang Upi Municipal Police Station sa bahin sang Barangay Nuro Upi, Maguindanao del Norte.
Suno sa kapulisan, duha ka salakyan ang nabalabagan sang PNP sa ginpatigayon nga checkpoint kun diin nakumpiska ang 60 ka dalagko nga kahon sang mga smuggled nga sigarilyo nga Fort, 40 ka kahon naman sa Toyota Hiace samtang ang 20 nakumpiska naman sa Suzuki Minivan.
Bangud sa mga madamo nga sigarilyo nga nakumpiskar, gin-aresto ang lima ka mga indibidwal nga kasamtangan nga nakapreso sa Upi MPS.
Temporaryo naman nga ginakustodiya sang Upi MPS ang mga ebidensya kag natalana nga igaturn over sa pag-inakop sang Bureau of Customs para sa tama nga dokumentasyon kag disposisyon.
