KORONADAL CITY – Nagapadayon ang imbestigasyon sang mga otoridad sa nagluntad nga pagpangluthang-patay sa tatlo ka mga menor de edad sa boundary sang Sitio Basak Polonuling, Tupi, South Cotabato kag Purok 1, Barangay Sumbakil, Polomolok, South Cotabato.
Ginkilala ni Police Lt. Col. Sally Wandingan, hepe sang Polomolok PNP ang mga napatay nga sanday Rahman Jeorfo Sumapal, Nasser Maguisilan Diamalo kag Jade Jamal Abpit lunsay residente sang nasambit nga barangay.
Naguwa sa imbestigasyon sang kapulisan nga ang mga biktima ang nagpangawat sang lubi sang isa ka coconut farm lot sang hinali na lamang nga nag-abot ang tatlo ka wala makilal-an nga mga suspek sakay sang motorsiklo bitbit ang mataas nga kalibre sang armas luthang nga ginbutang sa sako.
Hinali na lamang nga ginpangluthang ang mga biktima kun diin gilayon nga ginbawian sang kabuhi sanday Sumapal kag Diamalo.
Nakpalagyo pa kuntani ang kaupod sang mga ini apang naabtan sang tatlo ka suspek si Bapit sa Mirabueno Farm kag gilayon man nga ginluthang.
Masuwerte naman nga nakapalagyo ang duha pa ka mga kaupdanan sang mga biktima.
Narekober sa ginluntaran sang krimen ang pila ka bunga sang lubi apang wala sang mga nakuha nga mga basiyo kag slug sang armas nga gingamit sa pagpatay sa mga biktima.
Dako naman ang pagpati ni Wandingan nga security sang mga farm nga ginkawatan sang mga ini ang nagpatay sa mga biktima ukon indi gani ka-kompetensiya sa pagpangawat.
Hugot naman nga ginkundenar sang Polomolok PNP ang natabo nga pagpatay sa mga biktima.
