KORONADAL CITY- Nagpadulong sa police station ang yara sa masobra 100 ka mga residente sang Purok Matahimik, Barangay Kinram, Isulan, Sultan Kudarat agud maghingyo sang bulig sa nagakatabo nga kinagamo sa ila lugar tuga sang agaway sang duta.
Sa interbyu sang Bombo Radyo Koronadal kay Jojo Resobalde, nagatindog nga spokesperson sang masobra 100 ka mga residente nga nagapuyo sa nasambit nga lugar, nagalab-ot sa 50 ka ektarya sang duta ang madugay na nga ginaagawan sang 4 ka grupo lakip na ang isa ka konsehal sa nasambit nga banwa.
Suno kay Resobalde, naglab-ot sa punto nga nakaangkons ang kambyuhanay sang lupok sa grupo nanday Atty.Richard Resisme,municipal councilor sang Isulan kag grupo sang pamilya Delbano nga nagresulta suno pa sa pagkapatay sang 2 katawo kag pagkapilas naman sang isa pa.
Apang, hugot namna nga ginpanginwala ni Pol. Supt. Joefel Siason, hepe sang Isulan PNP nga may casualties sa nagluntad nga engkwentro sa tunga sang duha ka grupo.
Ginpahayag ni Siason nga may natabo nga engkwentro apang wala suno pa sang casualties sa duha ka bahin base sa imbestigasyon nga ila nga ginhimo.
Aminado si Siason nga madugay na ngamay kinagamo sa lugar bangud sa inagaway sang duta kag yara na sa DAR kag MENRO na ang problema.
Sa pagkamatuod, nagpatunga naman ang provincial government sa mga grupo nga claimants sang duta agud nga masolusyonan ang problema.
