KORONADAL CITY- Naglab-ot na sa duha ka barangay sa siyudad sang Koronadal ang apektado sang African Swine Fever ukon ASF kun diin yara sa masobra 1000 nga baboy ang gilayon ginpaidalom sa depopulation ukon culling.
Ini ang ginpahayag ni Dr. Charlemaigne Calo, City Veterinary Officer sang Koronadal sa eksklusibo nga interview sang Bombo Radyo.
Suno kay Dr. Calo, ginakabig nga ground zero sa subong ang Purok Garcia sang Barangay Rotonda kag Purok Nagkakaisa sang Barangay Namnama sa siyudad.
Sa nasambit nga numero halos 50 ang makabig nga back yard hog raisers samtang yara naman sa halos 1000 ang gikan commercial piggery.
Gilayon naman nga ginhatagan sang ayuda ang mga apektado nga residente kabaylo sang pagkumpiskar kag paglubong sang ila nga mga baboy.
Dugang pa Dr. Calo, isa ka incursion ang natabo sa Koronadal kag gilayon nga ginhimo ang proseso agud nga malikawan ang paglapta sini.
Sa subong, under control na ang sitwasyon kag indi na kinahanglan nga magpanic ang mga tawo.
Apang, magapadayon ang pagbantay sa mga nakasulod sa 1 kilometer zone.
Ginaawhag man sini ang mga consumer nga likawan ang pagbakal sang karne sang baboy sa mga infected areas kag ang mga ginabaligya nga barato nga karne sang baboy labi na ang buy one take one nga lechon.
Una diri, ginpaidalom na sa red status ang probinsiya sang South Cotabato matapos nga mangin apektado ang mga banwa sang Banga kag Surallah kun diin nilibo nga baboy man ang ginpaidalom sa culling.
