KORONADAL CITY – Ginpasiguro sang mga kapulisan ang mas hugot nga pagpatuman sang kampanya kontra ilegal nga droga, kasunod sa pagkapatay sang duha suno pa ka bigtime drug pushers sa ginpatigayon nga buybust operation sa siyudad sang Tacurong.
Sa interbyu sang Bombo Radyo Koronadal kay PSupt. Joefel Siason, hepe sang Tacurong PNP, ginpatigayon ang nasambit nga operasyon sa isa ka boarding house sa Prk. Maligaya, Brgy San Pablo, Tacurong City kun sa diin nagbato suno pa ang mga suspek sa mga otoridad.
Ginkilala sang mga kapulisan ang mga napatay nga suspek nga sanday Basir Ayada Kamaong, 36 anyos kag Rashid Batunoan, 37 anyos, nga lunsay mga residente sang Datu Paglas, Maguindanao.
Narekober sa mga targets ang kalibre 22 kag kalibre 45 nga mga armas luthang, isa ka large sachet kag pila ka mga small sachet sang ginapatihan nga shabu kag mga drug paraphernalia.
Nahibaloan nga gina-monitor na sadto sang PDEA-ARMM ang panimalay sang mga suspek sa Datu Paglas, Maguindanao sadtong 2017.
