POLOMOLOK, SOUTH COTABATO -Nakapreso na sa subong ang anum (6) ka kalalakihan makaligad suno pa nga gin-gang rape ang isa ka 19 anyos nga dalaga sa tunga sang ginapatuman nga enhanced community quarantine sa banwa sang Polomolok, South Cotabato.
Ginkilala ang biktima kay alyas “Jenny”, 19 anyos kag residente sang nasambit nga lugar.
Nahibaluan nga gin-agda suno pa ini sang iya abyan nga mag-inom kaupod ang anum ka suspek.
Sandig sa kapulisan, mismo ang biktima ang nagpadulong kag nagreport sa mga kapulisan sang panghilitabo.
Kabangdanan nga nagpatigayon sa gilayon sang hot pursuit operation ang mga otoridad kon sa diin natikma ang mga suspek.
Nakuha suno pa sa mga ini ang tig -isa ka sachet sang ginasuspetsuhan nga shabu.
Sa subong, yara na sa custodial facility sang Polomolok PNP ang nasambit nga mga suspek kag nagapangatubang sang kaso nga pagpanglugos kag RA 9165 ukon Comprehensive Dangerous Drugs Act of 2002.
