Naglab-ot sa indi magnubo sa 14 ka kabataan ang napatay kag lima pa ang napilasan matapos nagguho ang atop sang isa ka tutoring center sa siyudad sang Lahore, sa sidlangan nga bahin sang Pakistan sang Martes.
Ginkumpirmar sang mga opisyal sang siyudad ang kadamuon sang mga napatay kag nagsiling nga may isa man ka maestro nga napilasan.
Nahibaluan nga ang mga biktima nga napatay nagaedad sang 4 tubtob 12 ka tuig.
Padayon nga ginatambalan sa ospital ang mga napilasan. Duha ka tawo ang gin-aresto sang mga awtoridad may kaangtanan sa insidente.
Padayon man ang pagtipon sang ebidensya sa lugar nga natabuan sang trahedya. Nagpabutyag man sang iya pagpakig-unong sa kasubo si Pakistan Prime Minister Shehbaz Sharif sa mga pamilya sang mga biktima kag nagmando sang madali nga paghatag sang medikal nga bulig sa mga napilasan.
Suno pa sa opisyal, ila ipatuman ang “transparent, unbiased and immediate investigation” agud mahibaluan kag mapanabat ang mga responsable sa sini nga makasulubo nga insidente.
Nahibaluan man nga masami ang pagguho sang mga bilding sa Pakistan bangud sang maluya nga safety standards kag substandard nga mga materyales sa konstruksyon.
Sang nagligad nga tuig, 27 ka tawo man ang napatay matapos nagguho ang isa ka bilding sa Karachi, Pakistan.
