KORONADAL CITY – Naglab-ot na sa masobra 4 ka libo ang napagkit nga kaso sang dengue sa Rehiyon 12 sa una nga quarter sang tuig.
Suno kay DOH 12 Dengue and Measles Prevention Program Spokesperson Jenny Ventura, ang nasambit nga numero ang halin sa monitoring sang DOH sang Enero tubtob Marso 30, 2019.
Mas mataas suno pa ini sang 178 percent kumparar sa 1,449 dengue cases sa SOCCKSARGEN sa kasubong nga period sang nakaligad nga tuig.
Ginpahayag man ni Ventura nga nagapanguna sa pinakamadamo nga kaso sang dengue sa rehiyon amo ang probinsya sang North Cotabato nga may 1,444 dengue cases, ika-2 ang South Cotabato nga may 1,196 kag ika-3 naman ang Sultan Kudarat nga may 480 nga kaso sang dengue.
Ginkimpirmar man ni Ventura nga 13 na ang ginbawian sang kabuhi bangud sa dengue sa rehiyon kun sa diin 7 diri ang halin sa North Cotabato kag tag-3 naman ang halin sa Sarangani kag South Cotabato.
Sa karon, nagpanawagan ang DOH nga mangin malimpyo sa palibot agud makalikaw sa pagdamo sang lamok nga nagadala sang dengue.
