KORONADAL CITY -Isa ang patay samtang naglab ot naman sa masobra 7.8 million ang danyos nga napagkit sang sunog nga nagluntad sa Manuel Roxas St. Brgy. Poblacion, Norala, South Cotabato, kaina sang aga, Enero 8, 2026.
Ginkilala sang mga awtoridad ang biktima nga si Cody Perez Parcon, nasa legal nga pang-edaron, may asawa, kag residente sang nasambit nga lugar.
Sa inisyal nga imbestigasyon, ginapatihan sang mga awtoridad nga nag-umpisa ang pag-ibwal sang kalayo sa tunga na bahin sang mga stall.
Sa kumpirmasyon man ni Kagawad Ramil Paba sa Bombo Radyo Koronadal, napulo ka mga stall ang naapektuhan sa nasambit nga sunog.
Ginpahayag ni SFO4 Ronald N. Navares, ang Acting Municipal Fire Marshal sang BFP Norala nga padayon ang ila imbestigasyon agud mahibaluan ang matuod-tuod nga gin-umpisahan sang sunog.
Nagapanawagan naman si Navares sa publiko nga mangin alerto kag i-report gilayon ang mga insidente nga posible magluntad sa palibot.
