KORONADAL CITY – Isa ang ginbawian sang kabuhi samtang duha naman ka mga puluy-an ang gin-anod sang tubig-baha samtang halos 50 pamilya ang apektado matapos nga maguba ang dike bangud sa pagsaka sang lebel sang tubig sa Allah River kun diin apektado man ang mga probinsiya sang South Cotabato kag Sultan Kudarat.
Ginkilala ang napatay nga si Roger Barnezo, 44-anyos nga residente sang Barangay Dajay, Surallah, South Cotabato.
Sa interbyu sang Bombo Radyo Koronadal kay MDRRMO Leonardo Ballon sang banwa sang Surallah, ginausoy sang biktima ang kalabaon sang taytay papuli kaupod ang asawa kag bata sini kagab-i sang hinali nga na-slide kag nahulog si Barnezo kag gin-anod snag mabaskog nga tubig kaupod ang motorsiklo sini.
Samtang, yara naman sa duha ka panimalay ang gin-anod man sang tubig baha sa bahin naman sang Purok Bagong Pag-asa, Barangay Kulambog , Isulan,Sultan Kudarat kag boundary sang Sto. Niño,South Cotabato bangud sa pagkawasak sang dike.
Nagpabilin naman sa kilid sang dalan ang yara sa 50 ka mga pamilya bangud sa pagbaha samtang nagapangayo ang mga ini sang bulig labi na pagkaon kag trapal.
Pila ka mga taytay naman ang indi maagyan bangud sa naguba ini tuga sang pagka-ab-ab sang duta kun diin apektado ang mga residente sang barangay Veterans, Surallah, Upper kag Lower Maculan subong man ang Halilan sa banwa sang Lake Sebu, South Cotabato.
