KORONADAL CITY– Mangin dako nga hangkat suno pa sa Duterte administration ang pagpatuman sang zero billing sa mga pampubliko nga ospital sa bug-os nga pungsod nga ginpahayag ni Pres. Rodrigo Duterte sa iya ikaduha nga State of the Nation Address sang lunes, Hulyo 24.
Sa interbyu sang Bombo Radyo Koronadal kay South Cotabato Governor Daisy Avance Fuentes, isa ka manami nga plano ini kag prebilihiyo ilabi na sa mga pigado nga pumuluyo sang probinsya apang isa ka dako nga hangkat ang sustainability sang nasambit nga programa ilabi na bangud limitado lamang ang pondo sang gobyerno para sa mga pampubliko nga ospital kasubong sang South Cotabato Provincial Hospital.
Dugang pa sini nga kasubong nga nagapamulubi ang lokal nga gobyerno sa oras nga mapatuman ini ilabi na kag wala sang klaro nga tikang kun sa ano nga paagi ini matutustusan partikular na sa pagbakal sang mga bulong sa oras nga maubusan na sang pondo.
Sa subong imposible pa nga mapatuman ini sa probinsya apisar nga may yara pa sang green light para sa nasambit nga programa gikan sa chief executive.
