Ginpahayag ni anay kongresista Carlos Isagani Zarate ang Bayan Muna Representative nga ang sentro sang Article 4 sang impeachment complaint batok kay Vice President Sara Duterte amo ang isyu sang betrayal of public trust ukon paglapas sa pagsalig nga ginahatag sang katawhan sa isa ka mataas nga opisyal sang gobyerno.
Gindugang ni Zarate, samtang nagataas ang posisyon sang isa ka opisyal, nagadaku man ang iya responsibilidad sa pagpakita sang integridad, disiplina, kag pagrespeto sa mga prinsipyo sang Konstitusyon.
Ginpabug-atan niya nga ang mga opisyal nga may mataas nga katungdanan kinahanglan maghimo sang mga tikang agud mapreserbar ang pagsalig sang publiko.
Dugang pa niya, importante nga bantayan sang mga Pilipino kon paano ginatuman sang mga lider sang gobyerno ang ila mga obligasyon sa idalom sang Konstitusyon.
Gin-athag man ni Zarate nga nagsugod pa lamang ang prosecution sa pagpresentar sang ila ebidensya para sa Article 4 kag may yara pa sila sang mga masunod nga adlaw agud ipagwa ang iban pa nila nga testigo.
Lakip sa ginapaabot nga magapakita sa impeachment court sa masunod nga semana amo si Atty. Zuleika Lopez, nga isa sa mga personalidad nga may kaangtanan sa kontrobersiyal nga press conference ni Vice President Duterte.
Sa katapusan, nanawagan si Zarate sa publiko apesar pa mga naga-suporta ukon nagakwestyon kay Vice President Duterte nga tan-awon ang impeachment trial bilang isa ka mekanismo sang Konstitusyon para sa accountability sang mga opisyal sang gobyerno.
Suno sa iya, kinahanglan mangin mabinantayon ang mga Pilipino sa pagtan-aw sa amo nga proseso bangud mahimo ini magsilbi nga basehan sa paghusga sang publiko sa mga lider kag sa pagpili sang mga kandidato sa masunod nga eleksyon sa 2028.
