KORONADAL CITY – Magabalik na sa operasyon ang mga bus units sang Yellow Bus Line Inc. umpisa buwas, Hulyo 3 makaligad ang masobra tatlo ka bulan nga nasuspinder bangud sa covid-19.
Ini ang ginkumpirmar ni YBL Operations Manager Boy Par sa interbyu sang Bombo Radyo Koronadal.
Gindugang sini nga kadungan sang ila pagbalik sang ila operasyon, mangin limitado anay ang igapaguwa nila nga bus units kag skeletal naman ang ila nga workforce.
Suno kay Par, mangin ruta nila sa pagbyahe sang ila mga bus ang Koronadal, Tacurong, Isulan, Surallah, Kidapawan, kag Makilala kun sa diin ginahulat pa nila ang executive order nga igapaguwa sang Gensan LGU agud makasulod sila sa byahe diri.
Apang indi pa sila makabiyahe padulong sa Davao, sandig sa executive order no. 36 ni South Cotabato Governor Reynaldo Tamayo Jr kun sa diin abri na ang provincial borders apang nagapabilin nga sirado ang regional borders.
Dugang sang opisyal, alas 6 sa aga tubtob alas 6 sa gab-i ang ila mangin operasyon kag maga-adjust sang ila operasyon depende sa demand sang tawo.
Ginhatagan punto man sini nga maga-pickup lang sila sa terminal kag ginadumilian ang pagpick-up sa mga pasahero samtang nagabyahe.
Samtang may gamay naman nga mga pagsaka sa plete kun sa diin yara sa P2.20 kada kilometro ang dugang nga sukot sa aircon, samtang P1.85 kada kilomtero sa non-aircon.
