Magasilbi bilang target sa maritime strike sa nagapadayon nga tuigan nga Balikatan exercise ang decommissioned nga World War II warship sang Philippine Navy.
Sa isa ka statement, ginpahayag sang Armed Forces of the Philippines (AFP) nga igapalubog ang anay BRP Miguel Malvar (PS-19) nga pagahimuon nga target sang mga assets halin sa Philippine Air Force, US Air force, US Marine Corps kag Australian Defense Force nga magapagwa sang nagkalain-lain nga sahi sang mga armas.
Gintukod ang Miguel Malvar sang tuig 1944 bilang USS Brattleboro kag ginkomisyon sang Philippine Navy bilang corvette.
Na-decommission ukon ginkakas sa serbisyo halin sa Philippine Navy ang nasambit nga barko nga pandigma sang 2021, isa sa ulihi nga WWII-era warship.
Sa mga naglabay nga Balikatan exercise, gintigayon man ang pagpalubog sang decommissioned ships patas sang BRP Pangasinan sang 2023 matapos ginpaulanan ang luma nga corvette sang mga bomba kag artillery rounds sa disputed waters.
Sa naglabay nga tuig, gingamit bilang target ang anay BRP Lake Caliraya nga isa ka Chinese-built tanker.
