KORONADAL CITY – Indi magapadala sa hadlok ang Bombo Radyo sa anuman nga pamahog nga ginahimo sang pila ka grupo nga gub-on ang nasambit nga waragwagan ukon pahugon sang anuman nga kaso para sa kamatuoran.
Ini makaligad ginbuyagyag sang Bombo Radyo Koronadal pagpanunto sang grupo nga World Philosophical Forum (WPF) nga nagapangayo sang P520 sa ila mga tagpalamati sa kada orientation bilang kabaylo suno pa sang binulan nga hulog nga P10,000 sa ila ATM.
Nahibaloan nga ginkuhaan sang Bombo Radyo sang nasambit nga grupo pinaagi sang isa sa ila suno pa nga pastor nga si Leo Ortega agud mahatagan sang tion nga mapaathag ang tinutuyo sang ila organisasyon kag pamatud-an suno pa nga sala ang mga akusasyon nga ginaakusar sa ila nga scam suno pa ang ila asosasyon.
Sang una nangin maayo ang pag-akomodar sang waragwagan kay Ortega agud ipahayag ang ila bahin.
Apang sa kadugayan, nagsaka na ang tingog sini kag ginpahog pa ang Bombo nga pagapasakaan suno pa sang kaso bangud sa pagpangguba batok sa WPF.
Diri ginsabat sang station manager sang Bombo Radyo Koronadal nga si Bombo Bing Endaya ang mga pamahog ni Ortega sa pahayag nga recorded ang nasambit nga isyu kag pagatalakayon ini sa programa nga Bombohanay Bigtime.
Ginpahayag pa ni Bombo Bing nga ginbase ang mga komentaryo sa nasambit nga investment scam sa mga pronouncements sang mga barangay kapitan nga nabiktima sang nasambit nga grupo kag ni Koronadal City Mayor Eliordo Ogena.
Tubtob sa subong nagapabilin nga abri ang Bombo Radyo sa nasambit nga grupo agud makapaathag sa ila nga bahin.
