KORONADAL CITY – Pagpamulitika kag personal nga kaakig suno pa ang nakit-an nga motibo ni Indigenous Peoples Mandatory Representative (IPMR) Edgar Sambog kun ngaa siya ang ginatudlo nga yara sa likod sang illegal mining sa banwa sang Tupi, South Cotabato.
Ginpahayag ni Sambog sa interbyu sang Bombo Radyo Koronadal nga handa siya nga mag-resign sa pwesto sa tion nga mapamatud-an ni Tupi Mayor Reynaldo Tamayo ang iya mga gina-akusar nga ini ang financier sa nasambit nga Illegal Mining nga 2 ka semana na suno pa nga naga-operate.
Suno kay Sambog indi matuod nga may illegal nga pagmina sa Brgy. Acmonan kag Brgy. Kablon sa nasambit nga banwa kun sa diin ang mga tinawo kag himata sini nga sanday Rico at Rammy Guerrero ang mismo mga direkta nga nagapatigayon sang operasyon.
Kadungan sini, ginhangkat ni Sambog si Mayor Tamayo nga pamatudan ang mga ginpahayag sini agod nga mapatihan.
Samtang, nagpanindugan si Tamayo nga matuod ang mga ginpahayag sini bangod ang mga residente sang nasambit nga mga barangay ang nagpalab-ot sang reklamo sa iya.
