Yara na sa kustodiya sang mga otoridad ang duha ka tawo nga sakay sang wing van nga nabalabagan nga may karga nga kinarton sang smuggled cigarettes sa Barangay Kenebeka, Datu Odin Sinsuat, Maguindanao del Norte.
Ini ang ginkumpirmar sang Maguindanao del Norte Police sa pagpanguna ni Colonel Sultan Salman Sapal.
Sandig sa report, nakabaton sang impormasyon ang kapulisan halin sa isa ka concerned citizen nga magaagi ang isa ka wing van nga puno sang mga smuggled cigarettes gikan sa Lebak, Sultan Kudarat padulong sa Davao City.
Gani, gilayon nga nagpatigayon sang choke point operation ang mga tinawo sang Datu Odin MPS, 1st PMFC MDN PPO kag RDEU/RIAT-CTU kag nabalabagan sang mga ini ang isa ka Suzuki Mini Wing Van.
Sang ila nga gin-inspeksiyon, natukiban nila ang 133 boxes sang sigarilyo nga nagakantidad sang PHP5,054,000.
Wala naman sang may mapakita nga legal nga dokumento ang duha nga sakay sang Wing van rason nga gin-aresto ang mga ini kag gindala sa police station.
Ginkilala ang mga ini nga sanday Ryan Gabriel kag Roy Borja nga lunsay mga residente sang Toril, Davao City.
NSa karon, nakig-angot na ang PNP sa Bureau of Customs para sa tama nga disposisyon sang nakumpiska nga dako nga kantidad sang sigarilyo.
