Nagluntad ang isa ka daku nga wildfire sa Andong, South Korea sang Marso 28, 2025, kag ini ang una nga bes nga natabo sa nasambit nga lugar.
Ini ang ginkumpirma ni Herme Linda Albao, Bombo International News Correspondent South Korea sa inteview sang Bombo Radyo Koronadal.//Suno saiya, madamo ang nag-evacuate sa nagkalain-lain nga evacuation centers.
Kadam-an sa ila nagkadto sa city gymnasium sang Andong, samtang ang iban naman naglakat sa ila mga pamilya.
Nagpadala sang madamo nga fire stations kag mga bombero, lakip na ang mga fire fighters halin sa local communities, apang bangod sang kusog nga hangin, hindi nila ini madason nga matapna.
Tungod sini, ginakabig nga daw “firenado” ang kalayo bangud sang matuod-tuod nga kabaskug sang paghugot sini sa palibot.
Dugang pa niya, zero visibility ukon ghost town ang ila village, kung sa diin aso kag kalayo lang ang makit-an samtang nagapadayon ang wildfire.
Dako ang perwisyo sang insidente, labi na sa pangabuhi sang mga residente.
Naapektuhan ang ila mga tanum kag uma, nga amo ang ila ginapagkitaan.
Ginabulubanta naman ni ALbao nga naglab-ot sa $60,000 tubtob $70,000 ang danyos sa iya puluy-an, wala pa nalakip diri ang danyos sa farm machineries.
Sa pihak sini, epektibo kag madasig ang pagresponde sang gobyerno sang South Korea.
Nagahatag sila sang bulig kag ayuda sa mga biktima pareho sang kwarta kag materyales, agud matukod ang temporaryong puluy-an nga pre-fabricated container van houses.
Samtang, Ang Philippine Embassy sa South Korea nagabulig man sa pagmonitor kag pagseguro nga luwas kag may nagakaigo nga bulig ang mga Pilipino nga apektado sang sunog.
