Malinong kag wala sang nagluntad nga insidente ang White Ribbon March nga gintambungan sang linibo ka mga miyembro sang religious, progressive, kag civil society groups sa Quezon City.
Matapos ang balaan nga misa sa EDSA Shrine nga ginpangunahan ni Bishop Jose Colin Bagaforo, nagmartsa ang mga partisipante pakadto sa EDSA People Power Monument nga may bitbit nga mga placards kag bandera nga nagapanawagan sang pagpanabat sa mga nalakip sa korapsyon.
Suno kay Hannah Shiena Sodela sang St. Paul University Manila, nag-upod siya sa martsa agud dasigon ang mga pamatan-on nga mangin mabinantayon kag magpanindugan para sa matinlo nga panggobyerno.
Ginpabutyag man ni human rights lawyer Maria Kristina Conti nga ang korapsyon amo ang nag-unang rason sang iya pagpakigbahin sa pagtililipon.
Samtang, nagpahayag ang NCRPO nga nagapabilin nga malinong ang sitwasyon.
Sang alas-3:30 sang hapon, naglab-ot sa 3,730 ang crowd estimate sa monumento, kag kapin 2,000 ka mga pulis ang gin-deploy para masiguro ang seguridad sang mga nagtambong.
