Madamo ang kasubong nga lider sang anay Presidente angot sa war on drugs, apang, siya ang gintutukan bangud nangin presidente siya sang pungsod.
Ini ang nangin reaksiyon ni Mayor Pedro Matinong – Surallah, South Cotabato angot sa confirmaton of charges ni FPRRD, sa interview sang Bombo Radyo Koronadal.
Suno kay Matinong, madamo man nga lider ang nagpatuman sang kampanya batok sa iligal nga droga, apang si Duterte ang mas gintutukan bangud nangin Presidente ini sang pungsod.
Ginpunto niya nga bilang pinakamataas nga opisyal sang gobyerno, natural lamang nga mas dako ang atensyon kag accountability nga ginatugyan sa iya.
Ginhatagan man pagtalupangod sang alkalde ang iya ginakabig nga positibo nga epekto sang war on drugs, nga suno sa iya nakabulig sa pagpanubo sang kriminalidad kag sa pagproteher sang komunidad batok sa mga problema nga dala sang iligal nga droga, kaangay sang pagpangawat kag pagpang-abuso.
Sa pihak sang isyu, nagpanawagan si Matinong sa katawhan, ilabi na sa mga nagaimbolbar sa iligal nga droga, nga untaton ang pag-usar kag pagbaligya sini, bangud wala ini sang maayo nga dala indi lamang sa ila kaugalingon kundi pati man sa ila mga pamilya kag sa komunidad.
