KORONADAL CITY – Naaresto sang mga otoridad ang isa ka wanted nga persona sa kaso nga illegal gambling sa ginpatigayon nga operasyon sa Lebak, Sultan Kudarat subong nga adlaw sang Miyerkules, Hunyo 26, 2024.
Ginkilala ni Police Lieutenant Colonel William Fascoy Jr.,hepe sang Lebak Municipal Police Station ang suspek nga si alyas “Bart”, 32 anyos, may asawa, isa ka driver kag residente sang Purok Molave 2B, Brgy. Aurelio F. Freires Sr. Lebak, Sultan Kudarat.
Suno kay PLtCol. Fascoy Jr., naaresto ang suspek sa ginpatigayon nga manhunt charlie operation sang gintingob nga pwersa sang mga tinawo sang Lebak MPS, CIDG 12 SKPFU, RID 12 Tracker Team Delta kag 2nd SKPMFC.
Ini ang sandig sa Warrant of Arrest para sa kaso nga PD 1602 ukon Illegal Gambling nga may rekomendado nga pyansa nga Php30,000.
Ang madinalag-on nga operasyon ang nagapakita lamang nga ang kapulisan ang indi mag-untat sa pagdakop sang mga Wanted Person agud nga mapabilin ang kalinong kag katawhayan sa komunidad.
