KORONADAL CITY – Yara na sa kustodiya sang kapulisan ang wanted nga isa ka incumbent councilor sa banwa sang Tantangan, South Cotabato bangud sa kaso nga rape kag sexual abuse.
Ini ang ginkumpirmar ni Vice Mayor Ceasar Dasilao sang Tantangan sa interbyu sang Bombo Radyo Koronadal.
Ginkilala ang opisyal nga si Municipal Councilor June Seneca nga residente sang nasambit nga banwa.
Suno kay Dasilao, naaresto si Seneca sa Barangay Bula, syudad sang General Santos. Dugang pa sang bise alkalde, isa ka menor de edad ang biktima kag nangin scholar pa sang konsehal.
Naguwa ang reklamo batok kay Seneca sang nagligad pa nga eleksyon tubtod nga ginpasakaan na sang kaso.
Kung madumduman, bulan pa sang Enero sini nga tuig sang naggwa ang warrant of arrest batok sa opisyal.
Sa ginpagwa nga warrant of arrest waay sang gin-rekomendar nga pyansa ang korte para sa kaso nga rape batok sa opisyal, samtang P200,000 para sa kaso nga sexual abuse.
Nahibaluan nga si Councilor Seneca kay liwat nga gin-pili sa pwesto sang nagligad nga eleksyon sa banwa sang Tantangan, South Cotabato taliwala sa mga akusasyon batok saiya.
