KORONADAL CITY – Gin-athag sang pamunuan sang Moro Islamic Liberation Front (MILF) nga wala sang foreign dignitaries nga magatambong buwas sa igapatigayon nga Bangsamoro Consultative Assembly sa Camp Darapanan, Sultan Kudarat, Maguindanao.
Ini ang ginkumpirmar ni Bangsamoro Transition Council Chairman kag MILF Ist Vice-Chairman Ghadzali Jaafar sa interbyu sang Bombo Radyo Koronadal.
Suno kay Jaafar, ginalauman ang pagtambong sang masobra 50 mil ka mga Muslim leaders kag katapu sang Central Committee sang MILF sa nasambit nga konsultasyon kadungan sang pagpresentar sa mismo nga kaundan sang Bangsamoro Organic Law (BOL).
Kadungan sini, ginpasiguro man ni Jaafar nga bukas ang nasambit nga pagtililipon para sa tanan nga nagalaum nga makab-ot ang kalinong kag pag-umwad sang Mindanao.
Pagkatapos sini magapadayon ang konsultasyon sang nagkalain-lain nga grupo kaupod na ang pagpakigdayalogo sa Moro National Liberation Front kag Bangsamoro Islalic Freedom Fighters (BIFF).
Nagalaum naman ang pamunuan sang MILF nga mangin mangin madinalag-on ang igapatigayon nga konsultasyon buwas.
