Ginmanduan sang Ombudsman si VP Sara Duterte kag 9 pa nga opisyal nga magsumiter sang sabat sa reklamo parte sa confidential funds.
Ginmanduan sang Office of the Ombudsman si Vice President Sara Duterte kag siyam pa ka opisyal halin sa DepEd kag Office of the Vice President (OVP) nga magpasaka sang counter-affidavit kag ebidensya matapos akusaron sang maling paggamit sang confidential funds.
May ara sila sang 10 ka adlaw halin sa pagdawat sang notice para magsumiter sang ila sabat, upod ang pagsaysay sang mga saksi kag iban pa nga dokumento.
Pahimangno sang Ombudsman nga kon indi magpasaka sang sabat sa ti-on nga ginpahamtang, ini pagakabig nga pagbuya sang katungdanan nga magdepensa kag padayon ang preliminary investigation.
Indi man pagbatunon ang motion to dismiss ukon motion for bill of particulars.
Ang mga kaso nga ginpasaka sang Kamara batok kay Duterte kag sa iban pa amo ang plunder, technical malversation, falsification, bribery, perjury, kag paglapas sa Konstitusyon. Ini may kahilabtanan sa ginreport nga ₱500M nga confidential fund sang OVP kag ₱112.5M sang DepEd halin 2022 tubtob 2024.
Sa mga gin-imbestigaran halin sa DepEd amo sanday Edward Fajardo, Gina Acosta, Atty. Sunshine Charry Fajardo, Maj. Gen. Nolasco Mempin (ret.), kag Undersecretary Annalyn Sevilla.
Sa OVP naman, ginlakip sanday Atty. Zuleika Lopez, Lemuel Ortonio, Lt. Col. Dennis Nolasco, kag Col. Raymund Dante Lachica. Ginpaginwala man ni VP Duterte ang mga alegasyon, nga kabahin man sang impeachment case nga ginpasaka sa Senado.
