Ginpahayag sang isa ka opisyal halin sa Office of the Vice President (OVP), nga si Vice President Sara Duterte mismo ang naghingyo sang P125 million nga confidential funds sang 2022, pila ka bulan matapos sia nagpungko bilang bise presidente. Sa hearing sang Impeachment Court kahapon, ginkumpirmar ni Lemuel Ortonio, Assistant Secretary kag Assistant Chief of Staff sang OVP, ang pirma ni VP Sara sa isa ka sulat sa Office of the President kag Department of Budget and Management (DBM). Nakasulat diri ang pangabay nga P125 milyon nga confidential funds.
Ginpahayag man ni Ortonio nga mismo si Duterte ang nagtalana sang kantidad nga P125 million, kag indi ini rekomendasyon halin sa budget division sang OVP. Suno sa liquidation report, ang bug-os nga P125 milyon ang ginpaguwa kag nagasto sa sulod lamang sang 11 ka adlaw, halin Disyembre 21 tubtob Disyembre 31, 2022. Ginpahayag man ni Ortonio nga, sa iya nahibaluan, wala sang confidential funds sa OVP sang panahon ni anay Vice President Leni Robredo, nga nagserbisyo tubtob Hunyo 30, 2022.
Gindeklarar nga hostile witness si Ortonio matapos ginpahayag ni Presiding Officer Chiz Escudero nga posible madulaan ini sang trabaho kun mapahalin sa pwesto si Duterte. Bangod sini, gintugutan ang prosekusyon nga maggamit sang leading questions sa pag-usisa sa iya.Madugay na nga nagatrabaho si Ortonio sa idalom ni Duterte, lakip na sang alkalde pa sia sang Davao City.
Ginagamit sang prosekusyon ang testimonya nanday Ortonio kag anay opisyal sang OVP nga si Gina Acosta agud suportahan ang mga alegasyon sang sala ng paggamit kag kwestyonable nga paggasto sang kabug-usan nga P612.5 million nga confidential funds sang OVP kag sang Department of Education.
