KORONADAL CITY – Ginalauman nga makaangkon sang maayo nga desisyon ang mga pumuluyo sa syudad sang Koronadal kun sin-o nga bise alkalde ang ila pagapilion sa palaabuton nga May 13, 2019 elections.
Ini makaligad ang madinalag-on nga pagpatigayon sang Debate sa Bombo 2019 sang Bombo Radyo kag Star Fm in partnership with Commission on Elections sa tunga nanday Vice Mayoralty Candidates Peter Miguel kag Erlinda Bing Pabi Araquil.
Nahibaluan nga tagsa tagsa man sang mga ini ginsabat ang mga mainit nga isyu nga ginahaboy batuk sa ila, ang mga krisismo sa ila pagdumalahan kag mangin man ang pagplastar sang ila tagsa ka mga plataporma.
Ginpanginwala naman ni Vice Mayoralty Candidate Miguel nga nagmanggaranon ini sa sulod sang iya tatlo ka termino bilang alkalde sang Koronadal bangud sa pagpangurakot sang kwarta sang katawhan.
Ginpahayag ni Miguel nga wala nagdamo ang iya nga propodad, wala nagbag-o ang iya nga lifestyle kag insakto lang ang kwarta nga yara sa iya pinaagi sa iya nga sweldo agud masustiner ang iya mga panginahanglanon.
Samtang, ginsabat ni Vice Mayoralty Candidate Araquil ang isa sa mga isyu nga ginahaboy sa iya, nga gina usar suno pa sini ang iya pagka komentarista sa pagpamulitika.
Suno kay Araquil, ginatugutan ini sang laye nga i-practice ang iya nga profession.
Ang Debate sa Bombo ang pinasahi nga inisyatibo sang Bombo Radyo Philippines agud mahatagan sang ligwa ang mga kandidato nga ipakilala ang ila kaugalingon sa katawhan kag pagbulig sa mga pumuluyo nga makaangkon sang giya sa ila mga dapat ibutang nga lider sa tagsa ka posisyon.
