KORONADAL CITY – Nagapati si Koronadal City incoming Vice Mayor Peter Q. Miguel nga maayo suno ang operasyon sang Kabus Padatuon ukon KAPA nga ginapamunuan ni Joel Apolinario bag-o pa man nga ginhilabtan sang third party ukon ni Pres. Rodrigo Duterte kag iban pa nga ahensya sang gobyerno.
Sa eksklusibo nga interbyu sang Bombo Radyo Koronadal kay Miguel, Donor to Donee lang suno pa ang sistema sang KAPA kag ang 30% nga blessing ang isa lang suno pa ka good gesture sang grupo bilang pagpakita sang pasasalamat sa mga miyembro sini.
Dugang pa sini nga bangud sa pagkadula ukon pagpasirado sang KAPA, madamo sang negatibo nga natabo ilabi na sa mga KAPA Members.
Samtang sa pihak nga bahin, ginpahayag naman ni Atty. Francis Carlos nga iligal ang operasyon sang KAPA bangud wala sini sang mapakita nga legal nga mga dokumento kag ma-athag nga indi donation ang natabo bangud nagahulat sang return of investment ang mga miyembro sini.
Dugang pa sini nga may salabton ang sinuman nga opisyla sang gobyerno nga nagapabulag-bulag kag nagapabaya sa proliferation ng investment scam.
Gindayaw man sini ang tikang sang gobyerno nga protehiran ang mas madamo pa nga mga Pilipino nga posible nga mabiktima sang KAPA kag iban pa nga investment scam.
Nahibaluan nga ginmando na sang DILG sa pagpanguna ni DILG Sec. Eduardo Año sa tanan nga mga City kag Muncipal Officials nga ipatuman ang pag revoke sa tanan nga mga permits kag lisensiya sang KAPA kag indi ini pagtugutan nga makakuha sang business permits.
