Duha ka motorista ang pilason matapos nagluntad ang isa ka aksidente sa bahin sang Bautista Rice Mill sa Brgy. Sto. Niño sang alas 7:20 sang gab-i, Mayo 23, 2025.
Base sa inisyal nga imbestigasyon, nagasunod sa isa ka direksyon padulong sa Barangay Hall sang Sto. Niño ang duha ka motorsiklo antes natabu ang insidente.
Ginkilala ang mga sangkot nga driver nga sanday Raymond C. Del Rosario, 47 anyos kag residente sang Marville Homes, nga nagamaneho sang Honda TMX 125 nga naga duag sang pula, kag Jay Aries Jinn Gardose, 32 anyos, residente sang Agriville Subdivision, Brgy. Sto. Niño, nga amo naman ang nagamaneho sang Suzuki motorcycle nga naga duag naman sang pula kag itom.
Suno sa mga testigo, ginbunggo sang Suzuki nga motorsiklo ang likod sang TMX 125 nga ginamaneho ni Del Rosario.
Resulta sini, nag-angkon sang nagkalain-lain nga pilas sa kalawasan ang duha ka motorista.
Si Del Rosario nga ginapatihan nga nakainom sang natabo ang insidente, gindala sa Southern Central Provincial Hospital (SCPH), samtang si Gardose naman yara karon sa isa ka pribado nga balay-bulongan.
Padayon ang imbestigasyon sang mga otoridad agud matumod ang rason sang aksidente kag kon may yara sang legal nga kaso nga posible igasang-att batok sa isa sa mga sangkot.
