KORONADAL CITY – Ginkumpirmar ni South Cotabato Police Provincial Director Senior Supt. Franklin Alvero nga antes magluntad ang insidente sang pagpanglutang sa banwa sang Polomolok, South Cotabato nag istoryahanay pa sila ni Police Senior Inspector Hernan Gabat ang Deputy Chief of Police sang Polomolok PNP nga isa sa mga napatay sa nagluntad nga pagpangluthang bangud sa ginpatigayon nga operasyon sa lugar.
Ginpahayag sa Bombo Radyo Koronadal nga magkaon kuntani ang mga pulis sa lechon house samtang nagapatigayon sang intelligence monitoring kag samtang nagapangita sang mapungkuan gulpi sila nga ginpaulanan sang bala.
Nagapati si Alvero nga target si PSI Gabat bangud siya ang una nga gin igo kag napatay samtang naulamid na lamang ang iban nga kaupdanan sini kag costumers sang Ephoy’s Lechon house sa National Highway, Prk. Pag-asa, Brgy. Magsaysay, Polomolok, South Cotabato.
Samtang magluwas kay PSI Gabat patay man ang kaupod sini nga BFP Personnel nga ginkilala kay si Carl Plomillo nga taga CARAGA kag isa pa ka Rio Salig Jr. nga nagakaon lamang sa lugar.
Samtang, pilason naman sanday Edgar Luzon nga isa ka katapo sang BFP, Jade Silva, Riza Diamante, Relyn Pitogo, waitress sang Ephoy’s kag Garizalde Villacora.
Dako naman ang pagpati ni Alvero nga may kaangtanan sa iligal nga droga ang pagpangluthang kay Gabat bangud sa asud asud nga drugs operation nga ginpatigayon sa banwa sang Polomolok sang nagligad nga inadlaw.
Sa subong nagapadayon ang imbestigasyon sang South Cotabato PNP sa nagluntad nga insidente.
