KORONADAL CITY – Kahimuan suno pa sang Bangsamoro Islamic Freedom Fighters (BIFF) ang panibag-o nga pagsigabong sang isa ka improvised explosive device (IED) sa Brgy. Timbangan, Shariff Aguak, Maguindanao alas-5:30 kaina sang kaagahon nga ginkapilas sang 2 ka suldado.
Ini ang ginkumpirmar ni Capt. Arvin Encinas, 6th ID, Philippine Army Public Affairs chief sa interbyu sang Bombo Radyo Koronadal.
Suno kay Capt. Encinas, nagpatigayon sang route security patrol ang mga elemento sang Charlie Company sang 40th Infantry Battalion sang matabo ang insidente.
Dugang pa sang opisyal nga bangud sa hugot nga pagbantay sang mga suldado wala sang mga sibilyan nga nalamita sa pagsigabong sang bomba nga gintanum sa kilid sang dalan.
Sa subong, nagapaayo na sa IPHO Maguindanao Hospital ang duha ka suldado nga pilason nga ginkilala kanday Pfc. Agudo kag Pvt. Saravia nga lunsay yara na sa luwas nga sitwasyon bangud minor injuries lamang ang naangkon sang mga ini.
Nagapadayon naman ang ginpatigayon nga clearing operation sang militar sa lugar.
Pagpati ni Encinas, luyag sang BIFF nga patalangon ang operasyon sang militar sa padayon nga paglagas sa ila rason nga ginhimo ang panibag-o nga pagpalupok.
