KORONADAL CITY – Ginapreparar na sang Koronadal City PNP ang kaso nga igapasaka batuk sa tatlo ka miyembro sang ‘budol-budol’ gang matapos nga maarestar sang mga otoridad.
Sa interbyu sang Bombo Radyo Koronadal kay Police LtCol Joefel Siason, ginkilala sini ang mga suspek nga sanday Manny Alvarez Diaz, 55, residente sang Dasmariñas, Cavite; Ricardo Mabanto Villaro, 47 sang Tondo, Manila; kag Brenda Castigador, 63, residente naman sang San Andres, Manila apang nagikan suno pa sa M’lang, North Cotabato.
Suno kay Siason, nadakpan sa akto ang mga suspek makaligad nga ginbiktima ang 70-anyos nga balo nga residente sang Triniville Subdivision, Barangay Zone 4, Koronadal City.
Nagkilalahay ang mga suspek kag biktima sa isa ka mall tubtob nga nakumbensir sang mga ini ang tigulang nga updan siya papule agud nga kuhaon ang passbook kag mga alahas nga ginhatag man sini kabaylo sang ginapatihan nga dako nga kantidad sang kwarta nga nakasulod sa itom nga bag.
Diri na kag naarestar sang intel operatives ang tatlo bangud nakuhaan ang mga ini sang CCTV footage.
Naghana pa ang mga suspek nga suhulan ang kapulisan sang P200,000 apang napaslawan ang mga ini.
Sa subong, nagapabilin sa kustodiya sang Koronadal City PNP ang tatlo samtang ginapreparar ang kaso batuk sa ila.
Kaangot sini, nagpanawagan naman si Siason sa iban pa nga mga nabiktima sang mga suspek nga magpadulong sa police station agud mapasakaan sang nagakaigo nga kaso ang mga ini.
