KORONADAL CITY- Nagsaka na sa masobra 1,000 ka mga evacuees ang nagapabilin subong sa Municipal gymnasium sang Antipas, North Cotabato nga naipit sa engkwentro sa tunga sang militar kag sang rebelde nga New People’s Army.
Sa ekslusibo nga interbyu sang Bombo Radyo Koronadal kay North Cotabato Police Provincial Director Senior Superintendent Emmanuel Peralta, wala na sang engkwentro nga natabo kag tigayon na nga ginbayaan sang mga rebelde nga grupo ang lugar kun diin nasecure naman kag yara na sa maayo nga sitwasyon ang mga naipit nga pamilya sa engkwentro.
Kaangot sini, gintawag naman nga mga terorista ni Peralta ang mga NPA nga nagpatigayon sang pag-atake ku diin ginhimo pa nila nga human shield ang yara sa 30 ka pamilya.
Madumduman nga nagpatigayon sang pagkanselar sang mga klase sa mga lugar nga pinakaapektado sang nasambit nga insidente partikular na sa Brgy. Camutan kag mga kaiping nga barangay sini.
Samtang, nagapadayon man ang pagpanghatag sang gobyerno sang mga ayuda sa mga sibilyan nga nagapabilin pa sa evacuation center angot sini posible nga makabalik naman sa ila puluy-an sa nasambit nga lugar.
