Siling nila, “the more, the merrier.”
Amo gid ini ang sitwasyon sa isa ka balay kun sa diin naga-istar ang identical twin sisters nga nakapamana man sang identical twin brothers.
Ang kapid nga babaye amo sanday Brittany kag Briana Deane. Humalin sang bata pa, nakaandan na nila nga pareho sila sa tanan nga bagay amo man sa ila hilig.
Tuig 2017 sang nagkadto sila sa Twins Day Festival sa Twinsburg, Ohio kun sa diin may biological twins, triples, quads, kag madamo pa.
Didto nila nakilala ang ila makabig soulmates nga sanday Josh kag Jeremy Salyers nga pareho sa ila, kapid man.
Wala na ginpadugay bangud makaligad ang isa ka tuig, ginkasal si Briana kay Jeremy kag si Brittany kay Josh.
Ang amazing pa gid amo nga gindungan ang seremonya sa ila nga kasal. Kag ang mas amazing amo nga nag-istar sila sa isa lang ka balay sa Bedford County, Virginia!
Sa subong, palareho na sila nga parents.
Sanday Brittany kag Josh ang may anak nga si Jett, samtang may Jax naman subong sanday Jeremy kag Briana.
Pareho nga tatlo ka tuig na subong ang edad sang mga bata.
Technically, magpakaisa sanday Jett kag Jax, apang bangud sa ila nga unique situation nga pareho nga identical twins ang ila nga mga ginikanan, ang duha ka bata ang makabig nga genetic brothers.
Ang tawag diri amo ang quaternary twins bangud ang duha ka sets sang parents ang may pareho lang nga DNA. Samtang nagadaku ang mga bata, mas labi man sila nga naga-close kag daw kaangay nga kapid man kaangay sa ila nga parents!
