KORONADAL CITY – Kahimuan suno pa sang mga talawan nga terorista ang natabo nga twin bombing sang Improvised Explosive Device (IED) sa Mt. Carmel, Cathedral sa Jolo, Sulu nga ginkapatay sang masobra 20 kag ginkapilas naman sang masobra 100 katawo.
Ini ang ginpahayag ni Hope Fernandez Mendoza, lead convenor sang Mindanao Peace Council sa eksklusibo nga interbyu sang Bombo Radyo Koronadal.
Suno kay Mendoza, hugot nga ginkondinar sang ila nga grupo ang natabo bangud bilang isa ka peace advocate makapila ka bes na suno pa sang nagpatigayon sang dayalogo sa mga utod nga Muslim, Kristiyano kag Lumad sa nasambit nga lugar.
Apisar suno pa nga minority ang mga Kristiyano sa Jolo, Sulu, maayo suno pa ang relasyon sang mga ini sa mga utod nga Muslim.
Hindi man suno pa makatawo ang ginhimo sang mga terorista bangud wala man lang ginrespeto ang pagka-banal sang simbahan kag gintarget pa ang mga silbilyan kag katapo sang AFP kag PNP.
Kaangot sini, natalana na magpadulong sa lugar ang Mindanao Peace Council agud magbulig sa mga biktima bilang humanitarian service kadungan sang panawagan nga ipangamuyo ang mga ini.
