KORONADAL CITY- Nangin madinalag-on ang ginpatigayon nga turnover ceremony sang mga functions kag mga dokumento sang anay Regional Legislative Assembly ukon RLA sang Autonomous Region in Muslim Mindanao sa bag-o gindihon nga Bangsamoro Parliament sang Bangsamoro Autonomous Region in Muslim Mindanao ukon BARMM sa Cotabato City.
Ginpangunahan ni anay RLA Speaker Datu Ronnie Quesada Sinsuat ang turnover ceremony kag ginpasa ang mga responsibilidad sang RLA kay Bangsamoro Parliament Speaker Atty. Mohammad Ali Pangalian Balindong.
Kaangot sini, gintambungan sang mga empleyado sang RLA kag pila ka mga myembro sang Bangsamoro Transition Authority ukon BTA ang nasambit nga seremonya nga ginpatigayon kadungan sang ika-2 nga sesyon sang BTA sa Shariff Kabunsuan Complex.
Tuman naman ang pagpasalamat ni BARMM Chief Minister Alhaj Murad Ebrahim sa RLA kag gin-insister nga importante ang ila nga ginhatag nga mga dokumento para sa epektibo nga pagpadalagan sang bag-o nga BARMM government.
Samtang, gintumod naman sa ika-2 nga session sang BTA ang parliamentary rules, committees, staffing kag organizational structure sang BTA parliament sa pagpanguna ni Speaker Balindong.
Nahibaluan nga sa kabug-usan nga 69 ka mga myembro sang BTA, yara sa 55 ang nagtambong sa nasambit nga regular parliament session.
