SURALLAH, SOUTH COTABATO – Indi matupungan ang kaakig kag pagkadismaya subong man kasubo nga ginabatyag sang asawa sang massacre suspect sang mabalitaan ang makaluluoy nga natabo sa pamilya sini sa Sitio Lambukon, Brgy. Canajay, Surallah, South Cotabato.
Sa ekslusibo nga interbyu sang Bombo Radyo Koronadal kay Hanny Vic Calibayan Dunis, ang misis ni John Jobert, nga indi sini mapasaylo ang bana sa ginhimo sa ginikanan kag utod sini.
Tuman nga pagpangemon ang iya nakit-an nga rason sang iya nga mister kun ngaa nakomiter sini ang makangilidlis nga masaker.
Ginpakigbahin man sini nga makapila ka beses nga ginpahog siya ni Jobert nga may matabo sa iya pamilya sa tion nga indi sini pagsabton ang iya tawag.
Sa pihak sini, pagapiliton suno pa ni Hanny Vic nga makamove-on sa hitabo paagi sa pagtrabaho sa abroad, apisar nga masakit sa iya ang mapalayo sa mga kabataan sini.
Kun madumduman, ginpatay sa buno sang suspek ang mga biktima nga sanday Benedicto, Japelina kag 15-anyos nga bata nila nga si Victoria Calibayan sa nasambit nga lugar.
