KORONADAL CITY- Nagapanabon kun nagakaon, daw masuka ang mga residente kun nagadapya na ang hangin sa Sitio Kaparida, Brgy. Acmonan, Tupi , South Cotabato.
Ini bangud suno pa sa piggery farm nga nahamtang sa nasambit nga barangay nga base sa mga residente ginapanag -iyahan sang kumbuyuhan suno pa nga Citra Mina.
Sa ekslusibo nga interbyu sang Bombo Radyo Koronadal sa pila ka mga residente sa lugar masobra tatlo ka tuig na nila gina-agwanta ang kabaho nga dala sang nasambit nga piggery farm.
Dugang pa sini nga kasubong wala suno pa sang nagakaigo nga sanitation ang nasambit nga babuyan nga ginakabalak-an sang mga pumuluyo.
Madamo sa mga residente ang nagasiling nga madugay na sila nagapetisyon batuk sa babuyan nga kun indi man mapasarado, nagakadapat lamang ipabilin nga malimpyo bangud malapit ini sa mga panimalay sang mga residente.
Tuman ka damo sang langaw sa palibot kag nakapagkit naman sang mga residente nga nagmasakit.
Ang iban naman wala na sang gana magkaon bangud sa nasambit nga baho nga ila mahakluan.
Bangud sini nagapanawagan sila sang gilayon nga aksyon sa ila lokal nga gobyerno agud masolusyunan ang ila madugay na nga problema.
Bukas naman ang waragwagan sang Bombo Radyo Koronadal sa pamunuan sang Cita Mina agud nga makapa-athag man sila sang ila bahin.
