Nagpasalamat pa si US President Donald Trump sa Iran bangud sa paghatag nila sang abiso antes pa ang ginpatigayon nga pag-atake sa US base sa Qatar.
Ginpahayag niya nga ginahingyo niya ang Iran nga magka-istoryahanay sang maayo upod ang Israel. Amo man ini ang iya plano nga paghimuon sa Israel nga dasigon man ini agud sa isa ka malinong nga pag-istoryahanay.
Dugang pa niya, wala sang bisan isa ka Amerikano ang nasamaran kag bisan ang mga pasilidad didto wala gid man sing daku nga kadaot. Bangud sini nga hitabo, daw nakabawi na ang Iran kag nagalaum nga magapadayon na ang isa ka malawig nga kalinong.
Sa pariho man nga tion, nagpasalamat man si US President sa Emir sang Qatar bangud sa pagpanguna sini sa pagduso sang kalinong sa rehiyon. Gin-alis na man sang US ang shelter advisory sa lugar matapos ang ginpatigayon nga airstrike sang Iran sa US base sa Qatar.
